ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាប្រទេសជាតិនឹងប្រឈមនឹងគ្រោះថ្នាក់នៅពេលដែលជាតិសាសន៍នៃប្រទេសនោះមិនស្គាល់អ្វីដែលជាអត្តសញ្ញាណរបស់ខ្លួន។

ក្នុងសារសំឡេងពិសេសទាក់ទងនឹងជម្លោះរវាងលោកស្រី ទ្រី ដាណា និងក្រសួងវប្បធម៌ នៅព្រឹកថ្ងៃទី៨ ខែមីនា ឆ្នាំ២០២៣នេះ សម្ដេចតេជោ ហ៊ុន សែន បានថ្លែងថា ការមិនស្គាល់ មិនចំណាំថាអ្វីជាអត្តសញ្ញាណរបស់ខ្លួន ហើយបែរជាទៅធ្វើឱ្យក្លាយតាមការតាំងបង្ហាញដោយគ្មានគម្រូហ្មត់ចត់ទេនោះ វានឹងប៉ះពាល់ដល់វប្បធម៌ខ្លួនថែមទាំងប្រឈមនឹងការចោទប្រកាន់ពីប្រទេសដទៃថាបានលួចយករបស់គេទៀត។

សម្ដេចថា៖ «គ្រោះថ្នាក់ណាស់នៅពេលដែលជាតិសាសន៍របស់យើងដែលមានអ្វីដែលជាចំណាំច្បាស់លាស់ហើយបែរជាទៅធ្វើឱ្យក្លាយទៅតាមការតាំងបង្ហាញដោយមិនបានយកគម្រូឱ្យហ្មត់ចត់ទេនោះ វានឹងប៉ះពាល់នឹងវប្បធម៌ខ្លួនឯងហើយវាក៏នឹងប៉ះពាល់ជាមួយនឹងប្រទេសដទៃដែលចោទថាយើងនឹងលួចយករបស់គេ។ ព្រោះនៅក្នុងតំបន់របស់យើងនេះមានទម្រង់នៃការស្លៀកសំលៀកបំពាក់ប្រហាក់ប្រហែលគ្នាដែលនោះគឺជារឿងដែលយើងត្រូវចៀសវាងដែលយើងអាចនឹងត្រូវទទួលការចោទ តែអ្វីដែលសំខាន់គឺវប្បធម៌យើងគឺនឹងក្លាយ»។

សម្ដេចតេជោ ក៏បានរម្លឹកទៅកាន់អំឡុងឆ្នាំ២០០០ ដែលសម្ដេចបានប្រតិកម្មចំពោះក្រុមហ៊ុនផលិតភាពយន្តដែលប្រើប្រាស់សំលៀកបំពាក់ប្រពៃណីខ្មែរខុសទម្រង់ផងដែរ៕